Les muyeres trabayadores tamos fartes
Fartes de soportar dafechu y ensin recursos la responsabilidá de los cuidaos. Fartes de la división sexual del trabayu que feminiza sectores convirtiéndolos en más precarios ya invisibles (llimpieza, alimentación, sociosanitariu, enseñanza, etc.), a pesar de ser imprescindibles para’l engranaxe d’esti sistema.
Yá son 2 años de xestión de la pandemia y nesti tiempu demostróse una y otra vegada que cada crisis que vien cute duramente a les muyeres.
Tamos fartuques porque siguimos ensin ver nengún cambiu qu’acabe cola fienda salarial, porque sigue apinándose la precariedá y la falta de contratos pa les muyeres. Ye un fechu que les muyeres coyemos más excedencias non remuneradas para encarganos de los cuidaos y que somos nós les que, en casu estremu, decidimos nun incorporanos al mercáu llaboral p’atender a persones dependientes y menores al nuesu cargu. Dende l’entamu de la pandemia, el númberu de muyeres nesta última situación aumentó en 150.000.
Tou esto, amás d’enchinos, emprobeznos.
El teletrabayu, que paecía la solución nel ámbitu llaboral ante la pandemia, enseñónos la otra cara de la moneda, cuidao que lo asumimos más nós que los homes y esto acentúa’l nuesu llabor como cuidadores y afecta a la nuesa promoción. Ye importante ver qu’equí non solo hai fienda llaboral, sinón qu’esiste una fienda de clase. Y esto, tamién nos enche.
La parcialidá nos contratos ye bien mayor en muyeres que n’homes.
Somos nós les que cargamos cola mayoría de los trabayos rellacionaos colos cuidaos y vemos na necesidá d’amenorgar la nuesa xornada llaboral para faenos responsables de trabayu non remunerado. Amás, del total de muyeres ocupaes, el porcentaxe más altu (29,0 %) correspuende a la ocupación de los servicios de restauración, personales, protección y vendedores. Socialmente, conozse qu’estes ocupaciones non solo tán feminizadas, sinón qu’amás son oxetu de fraude na contratación: xornaes parciales que son xornaes completes, etc.
La mayoría de les muyeres migrantes residentes tán desemplegaes o nun cuenten con contratu llaboral regularizáu, y son munches les que s’atopen en situación alministrativa irregular. Hai qu’acabar cola esplotación llaboral a la que tán sometíes estes muyeres, que nun denuncien por mieu a ser espulsaes, y esixir al Gobiernu’l so regularización.
El Réxime Especial d’Emplegaes de Llar ye esclavista, ensin drechu a prestación per desempléu, ensin accesu a la llei de riesgos llaborales. El despidu ye ensin preaviso nin indemnización, ensin cuntar la imposibilidá de pidir baxes nin permisos por mieu al despidu. Tampoco esiste’l derechu de realmisión como asocede nel restu de sectores.
Nun podemos escaecer el maltratu y abusos que sufren les emplegaes en dellos llugares de trabayu.
Qué dicir del atracu a les nueses pensiones. El llogru que nos viende’l Gobiernu “más progresista de la hestoria”, xuntu colos ministerios sindicales, nun ye más que’l timu de la revalorización de pensiones y un pasu más na privatización del sistema públicu de pensiones. Cuando millones de llares subsisten a dures penes cola pensión d’una muyer, bien sía xubilada, viuda o por discapacidá; en llugar d’utilizar l’IPC interañal (5,6 %) para la revalorización, tomen l’IPC promediu (2,5 %). Y non yá anguaño, olvidémonos de recuperar el nivel perdíu nos últimos años.
Nel mesmu casu de los convenios: qu’aceptemos pulpu, como animal de compañía.
Nun piensen aumentar el coeficiente de la pensión de viudeá, que tendría de ser un 100 %, pero a munches nun se-yos llega a reconocer nin el 60 %, que ye siguir na miseria.
La otra agresión al sistema públicu de pensiones son los planes privaos d’empresa. Equivalen al descuelgue de los convenios, pero peor: debiliten la nuesa capacidá de negociación, escapar del control públicu, pueden ser conrotos y mengüen los ingresos nel sistema.
Toes somos o vamos ser pensionistes.
Pa tener una pensión digna hai qu’empezar güei lluchando polos nuesos drechos colectivos, escontra les discriminaciones qu’enzanquen la independencia económica y denunciando qu’esti calvariu llaboral traduzse n’una peor pensión. Avanzar ye tomar conciencia de que’l problema de les pensiones de les trabayadores va xuníu al restu de condiciones llaborales y vitales que se soporten.
Y, por si fora poco, la gota qu’apina’l vasu: una nueva “reforma llaboral” na que nada camuda para nós: la temporalidá sigue ensin resolvese, a pesar de que quieran maquillala, llamando «indefiníos» a contratos que permanecen ataos a una naturaleza temporal, y ensin tocar les causes de los despidos nin les indemnizaciones. Tampoco se resuelve la cuestión de les subcontrates y la externalización de trabayadores, que afecten de lleno a sectores tan precarizados como’l de les kellys.
Les desigualdaes y discriminaciones que sufrimos les muyeres son estructurales y son consecuencia directa del actual sistema capitalista y patriarcal, qu’utiliza la violencia y tolos recursos a la so disposición para caltener l’orde social impuestu, y asina, consiguir que les estructures del sistema y les sos relaciones de poder sigan intactes.
Tamos enllenes, tamos fartes y, sobremanera, tamos entamando a organizanos.
Para facer frente a les desigualdaes que tenemos d’encarar facemonos fuertes cola CNT.
Somos conscientes de la realidá que nos arrodia, sabemos de les dificultaes a les qu’enfrentamos para sobrevivir dientro del sistema actual; sobrevivir o malvivir, porque para munches muyeres, el día ente día ye pura supervivencia.
Queremos tener vides dignes de ser vivíes, y para eso precisamos unes a les otres. Y non solo nesti Estáu; nun podemos escaecer qu’a lo llargo y anchu del mundu millones de muyeres lluchen acaldía para camudar les coses.
Dende equí, mandamos un saludu entusiasta y fraternal a toles soñadoras y lluchadores que sufren los rigores de la tiranía en tol mundu: les trabayadores de les fábriques de Myanmar, Bangladesh, Marruecos… Les compañeres kurdes, les zapatistas, les afganes…y toles que nun nomamos equí pero tenemos presentes.
Dende la nuesa diversidá y circunstancies somos la mesma clase, y caltenemonos xuníes.
Somos diverses y por eso ponemos enriba de la mesa una propuesta para acabar con tou tipu de opresiones sociales, llaborales y educatives, porque toes somos igual de pervalibles; vamos sumar les nueses esperiencies y saberes para facer frente a toles desigualdaes que sufrimos y consiguir una sociedá más xusta.
Somos muyeres organizaes que lluchamos escontra la esplotación, dando importancia a los cuidaos, y sofitándonos les unes a les otres para la construcción d’un mundu nuevu.
Un mundu anarquista pero sobremanera, feminista, nel que se reconozan les fundamentales aportaciones que facemos les muyeres na sociedá, güei y siempre.
Ante’l desborde, anarcofeministes en llucha.
Xúnite a CNT