REFORMA LLABORAL 2021: UNA ESTAFA A FAVOR DE LA PATRONAL
“¡Vamos a derogar la reforma laboral a pesar de todas las resistencias!”
Yolanda Díaz, Ministra de Trabayu, el 23/10/2021 nel actu de zarru del Congresu de CCOO.
L’Alcuerdu de Gobiernu celebráu ente PSOE y UP a finales de 2019 dicía espresamente nel so apartáu 1.3: “vamos derogar la reforma llaboral”. Pero, na enésima de les traiciones del PSOE a les trabayadores, nesta ocasión secundáu por UP, optó por llevar a cabu un retoque puramente cosméticu de la reforma de 2012. Sicasí, y como quier que pa tales falcatrúes sí que cunta con una plena cobertoria mediática que va dende la estrema derecha hasta los medios progre que lu sofiten (Públicu, eldiario.es, etc.), el Gobiernu optó por llanzase a una campaña de fakes que procura presentar los cambeos n’actual llexislación llaboral como un cambéu de paradigma nes relaciones llaborales y a la principal urdidora’l fraude (Yolanda Díaz) como una especie d’heroína.
Nun nos debe estrañar que la CEOE saludara la nueva reforma llaboral apautada porque -na so opinión- “consolida’l modelu llaboral actual” al caltener “intactos los mecanismos de flexibilidá interna que garanticen l’adaptabilidá de les empreses”.
1. LOS SUPUESTOS CAMBEOS NA TEMPORALIDÁ DE LOS CONTRATOS.
En xeneral, puede dicise qu’hai cuatro tipos principales de contratu llaboral n’España: indefiníu, temporal, pa la formación y en práctiques. La idea que quier vendese dende’l Gobiernu ye que la posibilidá de celebrar contratos que nun sían indefiníos va quedar bien llendao tres la reforma llaboral. Según esi rellatu, el calter indefiníu de la relación de trabayu va pasar a ser la regla, con apenes esceiciones. Pero finalmente esto nun ye asina.
En realidá, lo que’l Gobiernu fixo para consiguir la firma de la patronal nun ye más que desaniciar la modalidá “por obra o serviciu” y caltener l’eventual por circunstancies de la producción (por acumulación de xeres o escesu de pidíos) con dalgún cambéu menor, yá que introducen dos subtipos. Agora les empreses van poder recurrir a esta modalidá temporal, de primeres, cuando se produza una “medra ocasional ya imprevisible y les oscilaciones que, entá tratándose d’una actividá normal de la empresa, xeneren un desaxuste temporal ente l’empléu estable disponible y el que se requier”, con una duración d’un máximu de 6 meses, ampliables 6 más si asina lo dexa’l conveniu colectivu. Pero amás va poder, de segundes, roblase esti tipu de contratu temporal p’atender situaciones ocasionales, inclusive si son previsibles, con una duración d’un máximu de 90 díes nel añu natural.
A última hora, que reformulen el contratu eventual por acumulación de xeres o escesu de pidíos pa dexalu prácticamente igual.
¿Ye quiciabes digna d’aplausu la novedá de crear una concreta modalidá de contratu temporal amenorgada a solu 90 díes, porque implique dalguna meyora na lexislación? Según l’informe Costos económicos y sociales de la inestabilidá nel empléu, ellaboráu pol Gabinete Económicu Confederal de CCOO, los 4,4 millones d’asalariaos temporales repártense al añu más de 20,3 millones de contratos (4,61 contratos por persona con un contratu temporal y añu de media), lo que nos da una duración media de los contratos temporales que nun llega a los 80 díes.
Por eso, si tenemos en cuenta que la gran mayoría de contratos temporales duren menos d’esos 90 díes que s’estableció como duración máxima d’estos contratos, la incidencia de la norma sobro’l mercáu de trabayu va ser mínima. Ye más, naquellos casos nos que la duración prevista sía mayor de 90 díes, lo que puede implicar ye que la estinción de la relación de trabayu s’antemane, como forma d’evitar la conversión del contratu n’indefiníu, colo cual la reforma namái ayudaría a promover la yá peralta tasa de rotación nel trabayu característico nel mercáu llaboral n’España.
A lo último si amás consideramos que la esencia de la reforma llaboral del PP (el costu del despidu) nun se toca, la consecuencia de la eventual conversión d’un contratu temporal n’indefiníu tampoco sería tan grave pal empresariu, porque’l despidu d’una trabayadora indefinida que llevara trabayando 120 díes, pongamos por casu, namái supon la necesidá d’abona-y 11 díes de salariu, lo que significa un sobrecostu que nun llega al 10 % mientres la vixencia del contratu.
2. ¿CAMUDA DAQUÉ NOS CONTRATOS EN PRÁCTIQUES?
Respectu del contratu en práctiques, la so regulación permanez igual. La regla sigui siendo que la so concertación tien de tener llugar nos cinco años dempues d’acabaos los estudios. La única innovación ta en que, con arreglu a la llexislación vixente, esta clase de contratu va poder celebrase colos discapacitaos hasta siete años dempués del llogru del títulu académicu que da llugar a les práctiques, duración que se rebaxa a seis na propuesta gubernamental.
3. EL CONTRATU PA LA FORMACIÓN PAEZ QUE SÍ CAMUDA… Y EMPEORA.
Si hasta agora yera posible recurrir a esta modalidá para la contratación de moces y mozos ente 16 y 25 años qu’escarezan de la titulación requería pa celebrar un contratu en práctiques, na reforma gubernamental esa posibilidá amenórgase como regla (hai esceiciones) a moces y mozos ente 16 y 21 años.
En resume, cuidao que el contratu pa la formación ye temporal y acuta los derechos que tien la persona trabayadora suxeta a un contratu común, tien que se considerar positivo que se rebaxe de 25 a 21 años la edá máximo cola que puede alcordase esti tipu de contratu, y que la so duración ordinaria baxe de trés a dos años; pero hai que considerar negativu’l que la duración mínima pase d’un añu na actualidá a seis meses y que coles mesmes el tiempu mínimu que s’haya de dedicar a la formación mientres el primer añu baxe del 25 % al 15 %.
4. CONTRATU INDEFINÍU: REFECHURA DE MODALIDAES, PROPAGANDA Y NAMÁS.
Respectu del contratu indefiníu, dende la cla mediática del Gobiernu trátase de vendemos la idea de que, a partir de la nueva redacción del ET, como regla los contratos van ser indefiníos y que los temporales van ser namái aquellos qu’encaxen en dalguna de les modalidaes de contratu temporal, y que sobremanera, van pasar a ser indefiníos los contratos que se celebren para cubrir puestos de trabayu de temporada (hostelería, campañes navidiegues, etc.). Sicasí, hai que dicir que, nel planu de la llegalidá, ello ye yá asina, de cuenta que la pretendía innovación vendría ser una suerte de descubrimientu de la pólvora.
El nuevu contratu que se propón pola parte del Gobiernu tomaría estes dos modalidaes, pudiendo alcordarse “pa la realización de trabayos de naturaleza estacional o venceyaos a actividaes granibles de temporada, pa’l desenvolvimientu d’aquellos que nun tengan dicha naturaleza pero con feches de llamamientu ciertu anque indetermináu, según pa’l desenvolvimientu de trabayos consistentes na prestación de servicios nel marcu de la execución de contrates mercantiles o alministratives que, siendo previsibles, formen parte de l’actividá ordinario de la empresa”, circunstancia esta postrera na que tán les contrates, que nun dexen de ser un subtipu contractual dientro’l supuestu de contratos fixos con “feches de llamamientu ciertu anque indetermináu”.
5. ¿VA CAMUDASE DAQUÉ NA SUBCONTRATACIÓN?
Les empreses pueden solicitar los servicios d’otres compañíes pa que realicen parte de l’actividá qu’integra’l procesu productivu, al traviés d’una encomienda de xeres a una empresa esterna que se denomina subcontratación o outsourcing. Otra vez los intereses empresariales prevalecieron: afítase que la referencia para les trabayadores subcontrataes sía’l conveniu sectorial de l’actividá en cuestión, pero si la empresa de la que dependen tien un conveniu propiu, ye ésti’l que s’aplicaría. Eso sí, cuidao que s’apautó la preferencia del conveniu sectorial al respective de salarios, na práctica estos siguiríen marcaos pol sector. La empresa nun podría xugar a la baxa coles remuneraciones, anque nun asocede lo mesmo con otres condiciones llaborales (xornaes, horarios, compensación o abonu d’hores extra, etc.).
6. NUN SE RESTABLECEN LES ANTERIORES INDEMNIZACIONES POR DESPIDU, NIN TORNEN LOS SALARIOS DE TRAMITACIÓN.
Esto ye daqué que yá sabíemos dende l’entamu de les negociaciones, pos enxamás tuvo sobro la mesa restablecer les indemnizaciones por despidu que recortó la reforma llaboral del PP de 2012. Recordamos que, hasta 2012, les indemnizaciones por despidu improcedente xubíen a 45 díes de salariu por añu trabayáu con un tope de 42 mensualidaes, y que la empresa, inclusive cuando optaba pola indemnización frente a la realmisión, tenía qu’abonar sía que non los salarios de tramitación. Cola reforma llaboral de 2012 estes indemnizaciones quedaron amenorgaes a 33 díes de salariu por añu, con un tope de 24 mensualidaes, y desapaicieron los salarios de tramitación cuando la empresa optaba pola indemnización.
Con éses, paez que pal Gobiernu de coalición d’“esquierdes”, el gran recorte nos costos de les empreses pa despidir nun forma parte de los aspeutos “más lesivos” de l’anterior reforma llaboral. Despidir sigue siendo igual de barato que como lo dexó’l PP, cosa que nin s’atrevieron a plantegar nun entamu de la negociación cola Patronal.
Añedímos-y que la supresión de los salarios de trámite llevó a una fuelga xeneral el 20 de xunu de 2002, cuando’l PP fixo un primer intentu fallíu d’introducila por primer vegada na nuesa llexislación, y a dos fuelgues xenerales en 2012 (les de los díes 29 de marzu y 14 de payares), dambes contra la reforma llaboral de la cual esta supresión yera un componente esencial. Agora, sicasí, CCOO y UXT paecen dar por bono lo qu’ayeri consideraben inadmitible y la esquierda política santifica esti aspeutu esencial de la reforma llaboral del PP, poniendo de manifiestu hasta qué estremu de dexeneración llegaron toes estes organizaciones que viven del corrompíu sistema pseudodemocráticu.
7. DESPIDIR VA SIGUIR SIENDO, AMÁS DE BARATO, BIEN FÁCIL DE XUSTIFICAR.
Tampoco se revoquen les enormes facilidaes que pal despidu colectivu y pal despidu individual oxetivu por causes económiques, técniques, organizatives y de la producción s’introducieron cola reforma llaboral del PP.
Recordamos que, enantes de la reforma de 2012, los despidos colectivos precisaben l’autorización alministrativa. El PP non solo facilitó y amplió les causes de despidu colectivu, sinón que desanició la fase alministrativa de manera tala que, si’l periodu de consultes colos representantes de les trabayadores acababa ensin alcuerdu, la empresa pueda imponer el despidu colectivu a criteriu dexando tan solo la posibilidá d’impugnalo énte los Tribunales. Al Gobiernu PSOE-UP estos recortes de derechos tienen de paece-y bien porque nin intentaron modificalo.
Lo mesmo pasa coles facilidaes introducíes pola reforma del 2012 pa los despidos oxetivos individuales, que son aquellos que son indemnizaos namái con 20 díes por añu trabayáu con un máximu de 12 mensualidaes: nun se toquen y nun se fala d’ello, como si la facilidá pa despidir nun fuera por demás lesiva pa la clase trabayadora.
8. ¿Y QUÉ PASA COLA REFORMA LLABORAL QUE FIXO’L PSOE EN 2010?
A esa reforma llaboral, la que fixo’l Gobiernu de Zapatero en 2010, nin la menta, dándola dafechu por bona, seique cola esperanza de que la más fonda y lesiva reforma del PP de 2012 la esborrare de la nuesa memoria.
Pero CNT nun la escaez: naquella reforma, ente otros recortes de derechos, entamaron a ampliase los supuestos onde la indemnización por despidu improcedente yera 33 díes per añu (en cuenta de la de 45 díes), faciéndola estensible non solo yá a les contrataes embaxo la modalidá de “fomentu del empléu” como hasta entós, sinón tamién a les trabayadores con más de 3 meses nes llistes de desempléu, los paraos ente 31 y 44 años que tuvieren un contratu fixu y que se-yos estinguiera un contratu de calter indefiníu nuna empresa distinta, a los paraos que nos dos años anteriores tuvieren con contratos temporales y a los contrataos temporales a quien la empresa quixera facer fixos dende la reforma. Amás, inauguró la sienda de facilitar los despidos oxetivos por causes económiques y estableció el despidu oxetivu por absentismu.
9. LOS RECORTES NEL FOGASA TAMPOCO SE TOQUEN.
Una de les cuestiones que nun fueron trataes nin modificaes na reforma llaboral ye’l réxime xurídicu del Fondu de Garantía Salarial, l’organismu qu’abona a les trabayadores l’importe de los salarios pendientes de pagu ya indemnizaciones por despidu en casu d’insolvencia empresarial. Anguaño, España ye’l país con mayor medra d’insolvencies empresariales, lo que nos da una idea de la importancia d’esti organismu que, en bien d’ocasiones, ye l’encargáu d’abonar a les trabayadores lo que-yos correspuende.
Mientres l’añu 2012 modificóse’l sistema de cálculu de la prestación abonada pol FOGASA, de manera que se llendó l’alcance de la so responsabilidá y, d’esta manera, menguóse sobre manera la cantidá que les trabayadores pueden percibir de parte d’esti organismu en casu d’insolvencia del empleador.
D’una parte, amenorgóse’l máximu a abonar en conceutu de salariu, que pasó del triple del salariu mínimu interprofesional diariu con un máximu de 150 díes, al doble del salariu mínimu interprofesional diariu con un máximu de 120 díes.
Pela so parte, amenorgóse tamién la responsabilidá del FOGASA tocantes a la cantidá a abonar en conceutu d’indemnización per despidu. Con éses la base de cálculu pasó del triple del SMI al doble del mesmu.
Coles mesmes, modificóse’l réxime especial esistente pa les empreses de menos de 25 trabayadores, colo que s’amenorgó la cantidá a abonar en casu de que s’estinguiera’l contratu de resultes d’un despidu fundáu en causes económiques, técniques, organizativas o de producción del 40 % de la indemnización llegal al máximu de 8 díes de salariu, y afectando namái a los contratos indefiníos.
10. REFORMA LLABORAL Y REFORMA DE LES PENSIONES: XUEGU DE TRILEROS
Y pa poner el ramu d’esa dexeneración hai que s’alcordar de lo que ta asocediendo coles pensiones, otru casu de neollinngua, nel que l’ataque más grave a la capacidá adquisitiva de les pensiones de los últimos años ta escondiéndose con un falucar que trata de tapar la realidá. N’efectu, el pasáu xueves 2 d’avientu, el Congresu aprobó la reforma de les pensiones impulsada pol ministru José Luis Escrivá, una llei que tien ente les sos principales razones de ser l’actualización de les pensiones en función del IPC, pero con una poco disimulada trampa a la de realizar el cálculu del IPC.
La fórmula que s’utilizó dende siempres ye l’IPC acumuláu o interañal, un reflexu real de cuánto aumentó’l costu de la vida. Pero’l pactu de les pensiones ente’l Gobiernu, los dos sindicatos al serviciu del poder y la patronal escoyó otra fórmula: l’IPC mediu añal nos 12 meses previos, lo qu’equí y agora significa una perda d’un 3 % nel poder adquisitivo. Y ye que, anque l’IPC añal ye del 5.5 %, les pensiones namái van xubir un 2,5 %. Asina, por aciu una suerte de xuegu verbal, típicu de los trileros de la palabra en qu’estes organizaciones se convirtieron, les pensiones xuben con arreglu al IPC, pero l’IPC dexa de calculase como hasta agora s’había venío faciendo, p’asina tapar esti ataque a los bolsos de les pensionistes.
