El modelu sindical de la CNT
-¿Qué ye’l modelu dual de representación de les trabayadores?
La Constitución Española y la lexislación llaboral dexa la coesistencia de dos modelos de representación de les trabayadores: la representación sindical y la representación unitaria.
• La representación unitaria ye la que se constitúi celebrándose un procesu electoral(elecciones sindicales) y nel que s’escueye a los delegaos de personal o comité d’empresa, dependiendo del númberu de trabayadores emplegaos na empresa.
• La representación sindical ye la que constitúin les/os mesmes/os trabayadores afiliaos/es a un sindicatu por mediu les Secciones Sindicales, ensin depender del númberu d’emplegaos de la empresa y ensin necesidá d’un procesu electoral. Poro, los dos modelos tienen tola cobertoria llegal necesaria pa poder desempeñar la so actividá sindical. Anque les Secciones Sindicales emanen directamente del derechu fundamental a la llibertá sindical y tienen una protección xurídica mayor a la de los Comités d’Empresa, que se regulen pola llei ordinaria del Estatutu de los Trabayadores.
CNT opta pol modelu de Secciones Sindicales como la forma más eficaz de consiguir meyores llaborales y promover la participación ente iguales y pa refugar les subvenciones del Estáu, calteniendo xuna estricta independencia económica del sindicatu.
-¿Qué ye una Sección Sindical de CNT? ¿Cómo funciona?
Ye un órganu qu’axunta ́l conxuntu d’afiliaos/es d’un sindicatu nuna mesma empresa o centru de trabayu. La Sección Sindical constitúyese conforme a los Estatutos del propiu sindicatu y comunícase-y a la empresa de forma fehaciente.
La Sección Sindical de CNT empieza a funcionar dende que l’afiliación escueye un Delegáu/a y voceru de la mesma, que va ser la persona que va representar legalmente a l’afiliación énte la empresa. La so composición fomenta la participación real de los sos miembros y que nun s’acabe delegando siempres nes mesmes persones, como asocede colos comités d’empresa.
La Sección Sindical toma les sos decisiones de forma colectiva y horizontal, n’Asamblea, fomentando que les reivindicaciones que se plantegen a la empresa seyan les que realmente quier la plantiya.
Si la sección sindical precisaralo, tamién puede nomar distintos cargos pa que puedan desempeñar toles xeres necesaries (Secretaría de Prevención de Riesgos, Secretaría de Tesorería y Finances, Secretaría d’Organización, etc.).
Tolos cargos nomaos na Sección Sindical son revocables en cualquier momentu por decisión colectiva de l’afiliación. Esto permite’l control de les actuaciones, evita la corrupción y dota de flexibilidá pa camudar los cargos en cualquier momentu por alcuerdu d’Asamblea.
El Delegáu/a de CNT nun va firmar nengún alcuerdu que nun tenga’l respaldu de los sos compañeros/as.
-¿Fai falta convocar elecciones pa constituyila na mio empresa y nomar al delegáu/a?
Non. La Sección Sindical constituyese nuna Asamblea na que participa’l conxuntu de l’afiliación de la empresa o centru de trabayu.
La mesma afiliación noma al delegáu/a y escueye el restu de cargos
orgánicos de la Sección.
Esti procedimientu flexible y confidencial na constitución de la Sección Sindical facilita la so formación nun curtiu periodu de tiempu y ensin nengún tipu de reglamentaciones burocrátiques nin plazos llegales concretos.
-¿Y si na mio empresa yá hai escoyíu un Comité?
Nun esiste nengún inconveniente. La Llei permite la coesistencia del Comité d’Empresa y les Secciones Sindicales na mesma empresa.
La Sección Sindical puede constituyise igualmente y exercer la so actividá sindical, anque tamién esistan delegaos de personal o comité. Inclusive ye recomendable que se constituya xuna Sección Sindical de CNT para auditar y supervisar l’actividá del Comité y sirvir de contrapesu nes negociaciones sindical.
+¿Quién puede formar parte de la Sección Sindical de CNT?
Fórmenla tolos afiliaos y afiliaes de CNT na empresa o centru de trabayu.
Les Secciones Sindicales con mayor implantación suelen tener más poder de negociación y fuerza énte la empresa, por eso ye importante axuntar a la mayor parte de la plantiya.
Asegúrase la confidencialidad de l’afiliación que nun deseye asumir cargos na Sección, sacantes que solicite el descuentu mensual de la cuota sindical na so nómina.
Esto fai que los trabayadores/as pierdan el mieu a la esposición énte la empresa y puedan sentise incluyíos na representación sindical.
-¿Qué derechos tien?
Cualquier Sección Sindical de CNT tien los derechos básicos pa exercer la so actividá sindical nes empreses: distribuyir información llaboral fora de les hores de trabayu, recibir la información que-y unvia el so sindicatu y percanciar les cuotes de la so afiliación.
Si la Sección Sindical tien abonda implantación tamién puede convocar fuelgues y plantegar demandes per conflictu colectivu.
En dellos sectores, disponen tamién de derechos adicionales d’información y consulta, tablón d’anuncios, local sindical, etc.
Una Sección Sindical con implantación y sofitu abondu siempres va tener muncha más fuerza que los comités d’empresa o delegaos de personal.
La eficacia básase en que la plantiya pueda participar en tomar de decisiones y siéntase implicada nes lluches que se plantegen.
-¿La Llei garantízame protección xurídica?
El delegáu/a y los cargos de la Sección Sindical nun pueden ser despidíos, sancionaos, treslladaos nin sufrir nengún tipu de discriminación llaboral pol meru fechu de desenvolver la so actividá sindical, que s’atopa amparada pol derechu fundamental a la llibertá sindical.
-¿Qué diferencies básiques esisten ente una Sección Sindical y los Delegaos de Personal o Comité d’Empresa?
La representación unitaria apodérase la representación de tola plantiya y llegalmente puede negociar nel so nome ensin nin siquiamente realizar consultes nin votaciones.
Los Comités d’Empresa y Delegaos de Personal quiten el protagonismu a les trabayadores y nun dexen espaciu pa que la plantiya participe, proponga y decida. La plantiya acaba delegando toles decisiones nunes poques persones, ensin implicación real.
Por eso, cuando se convoquen movilizaciones de protesta nun suelen ser secundaes pola mayoría.
Los miembros de los comités d’empresa tienen xuna duración de 4 años y el procesu de revocación ye complexu y malo de poner en marcha. Apodérense la representación de tola plantiya y afáense hasta les siguientes elecciones sindicales, evitando los procesos de control.
Un modelu que se alloña de la realidá diaria del conxuntu de trabayadores.
Los sindicatos que se presenten a les elecciones sindicales, reciben subvenciones per representatividá per cada delegáu que s’escueye coles sos sigles nes empreses. Esto fai que la mayoría de sindicatos pierdan la so independencia y sían desacreditados énte la clase trabayadora.
N’empreses de mayor tamañu, los miembros de los comités d’empresa tienen la posibilidá d’atropar les sos hores sindicales pa convertise en lliberaos/as. Siguen cobrando de la empresa pero ensin tener qu’allegar al trabayu. Esto acaba alloñandolos de la realidá llaboral y diario de la plantiya, con privilexos que-yos estrema del restu de los trabayadores/as.
Dende CNT pensamos que’l modelu de comités d’empresa y delegaos de personal na actualidá amosóse ineficaz pa resolver los problemes diarios de los trabayadores/as, pos se convirtió nun modelu que deriva en munches ocasiones en casos de corrupción sindical.
Un modelu caducu que quedó desacreditao énte la mayoríade la clase trabayadora por non ser capaz de promover la participación y el control en tomar de decisiones ques’acaben delegando nunos pocos “privilexaos”.
Por tollo, CNT opta pol modelu de Secciones Sindicales como la forma más eficaz de consiguir meyores llaborales y promover la participación ente iguales, y pa refugar les subvenciones del Estáu y caltener la independencia económica del sindicatu.
-¿Por qué CNT non se presenta a les elecciones sindicales pa formar parte de los Comités d’Empresa?
L’acción sindical de CNT nes empreses llévase a cabu por mediu de Secciones Sindicales legalmente constituyíes, ensin que sía necesariu participar nes Elecciones Sindicales pa disponer de representación sindical.
Si decidisti a constituyir una Sección Sindical de CNT na to empresa, tienes de contactar cuanto antes col sindicatu, antes inclusive de comentalo con otros compañeros/as.
El nuesu serviciu d’asesoría sindical va informate de los pasos a siguir y va emponete na meyor estratexa pa constituyila coles abondes garantíes y protección.
Una vegada comunicóse la constitución a la empresa y el nomamientu del delegáu/a y otros cargos de la Sección, yá puede empecipiase l’actividá sindical.
Vas Tener a la to disposición a asesores de CNT p’acompañate a les xuntes cola Dirección de la empresa, revisión d’escritos, posibles denuncies, conflictos colectivos, estratexa de crecedera y efectividá, etc.
SI NADIE TRABAYA POR TÍ QUE NADIE DECIDA POR TÍ.
