Qué ye la CNT

Un sindicatu ye una asociación de trabayadores que busquen meyores nes sos condiciones de vida, tantu materiales como culturales. Si yes un/a trabayador/a (en activu, paráu/a, xubiláu/a…) y pienses qu'esta vida non te da tolo que te merez, qu'el to trabayu non te dexa desenvolvete como persona, el to llugar d'actuación como trabayador/a ye un sindicatu.

La Confederación Nacional del Trabayu ye una confederación de sindicatos de clase, qu'arrexunten a trabayadores/as de tolos oficios ensin distinción nos sos sindicatos de ramu.

La CNT ye una ferramienta de llucha para tola clase trabayadora.

Cualquier trabayador o trabayadora pue tar afiliáu/a al sindicatu, ensin importar les sos idees polítiques o creencies relixoses. Basta con que se comprometa a aceptar el nuesu pactu asociativu, y a respetar les decisiones que se tomen n'asamblea.

CNT ye una organización independiente que xune a trabayadores ensin matices. Pa caltener esa independencia, los miembros de partíos políticos o d'organizaciones relixoses nun pueden emplegar el sindicatu como foru de propaganda nin ostentar cargos.

Sicasí, nun caben en CNT aquelles persones que nun pueden considerase trabayadores, como son los empresarios, rentistes, grandes propietarios, executivos y altos directivos, cargos políticos de l'alministración, etc. Policíes y cuerpos represivos en xeneral, tampoco pueden ser afiliaes a la CNT.

Finalmente, por coherencia, tampoco almitimos la doble militancia de trabayadores afiliaes a otres centrales sindicales.

La CNT ye distinta. Los nuesos estatutos garanticen que nel sindicatu, ye l'asamblea la que manda. Y na asamblea, toles pallabres tienen el mesmu pesu. Si tienes les tos razones, vas poder decidir el camín que vas tomar.

La CNT ye una central sindical que tien munchos años d'andadura, y estremóse en tola so trayectoria por ser una organización na que les decisiones tómense dende la base, na que la xente participa, na que nun hai dirixentes y esiste plena llibertá ya igualdá nel intercambiu d'idees, opiniones ya iniciatives.

En CNT toes somos iguales y naide cobra un sueldu por representar a les trabayadores.

CNT fundose en 1910, y ente los sos llogros tán les lluches qu´iguaron la xornada d'ocho hores, el descansu del sábadu, les vacaciones pagues, los seguros d'enfermedá, xubilación y paru, la contratación obligatoria de paraes. Promovio fuelgues d'arriendos. Fundó escueles, biblioteques, editoriales. Foi una de les organizaciones que participó na Revolución de 1934 n'Asturies. En 1936 enfrentose al exércitu franquista y venciolu en munches ciudaes, llevando esta victoria en casos como Barcelona, a una revolución social que colectivizó la tierra y l'industria dando llugar al tresformamientu social más fondu de la hestoria d'Europa del sieglu XX.

Esti sindicatu ta rexíu nel so funcionamientu polos principios del sindicalismu revolucionariu:

a) El principiu d'Autoxestión: Pensamos que les que tienen de decidir sobre los problemes que-yos atañen, son les afectaes por esos problemes. Si naide trabaya por ti, naide tien de decidir por ti. Por eso la CNT ye un sindicatu asambleariu: dientro d'ella, quien decide siempres ye l'asamblea de afiliaes.

b) El principiu de Federalismu: Cada sindicatu de la CNT tien autonomía p'actuar dientro del so ámbitu y al empar confedérase col restu de sindicatos p'actuar xuníos ante les circunstancies a que s'enfrenten.

c) El principiu de Solidaridá y Apoyu Mutuu: Tou sindicatu de la CNT establez un pactu solidariu col restu de la confederación, que fai que cada agresión que reciba una de los sos partes seya respondida pola totalidá. Lo mesmo puede dicise ente les afiliaes de cada sindicatu.

Les trabayadores acomuñense en sindicatos, estos federense a nivel llocal, rexonal y nacional na CNT y la mesma esta federará con sindicatos de tou´l mundiu, como la FAU d´Alemania, la USI d´Italia y otres tantes, na Confederación Internacional del Trabayu. Porque sabemos que dependemos unes de otres a nivel internacional. Frente al neolliberalismu globalizador, oponemos l'internacionalismu proletariu.

La táctica de la CNT ye l'Acción Directa, que significa que la solución de los conflictos que surdan, hai de ser llograda polos individuos afectaos ensin intermediarios. Consideramos qu'esta forma d'actuar déxanos aprender a actuar sobre lo que nos afecta y asina asumir responsabilidaes. Ser anarcosindicalista significa tomar decisiones, y decidir ye daqué bien difícil: significa tener problemes. Porque una vegada qu'alcuerdes daqué y vaigas ponelo en práctica, vas atopar que se te van oponer les tos enemigos naturales: los empresarios. Ellos tán interesaos en faete trabayar lo máximo posible pol menor salariu pagable. El to interés ye contrapuestu al de «ellos». Tu quies trabayar menos, vivir meyor, y eso topeta frontalmente colos sos planes.

Toos estes idees asamblearies tán inspiraes nes idees anarquistes. L'anarquismu ye una idea política qu'afirma que la sociedá puede entamase ensin poder, ensin coacción y ensin violencia. Negamos que precisemos especialistes políticos capacitaos pa decidir en nome d'otres persones.

Esiste una idea negativa, errónea, d'anarquía como sinónimu de caos y violencia. Nosotres consideramos l'anarquía como sinónimu d'orde ensin imponer, llibertá y ausencia de coacción.

Queremos el tresformamientu radical de la sociedá, la supresión del trabayu asalariáu, la revolución social. La nuesa finalidá ye'l Comunismu Llibertariu, un sistema sociu-económicu que faiga de la llibertá y de la igualdá los sos valores fundamentales. Y pensamos que pa consiguir los nuesos fines tenemos d'utilizar unos medios coherentes con ellos. Non tou val. El fin nunca xustifica los medios. Si queremos una sociedá llibre, igualitaria y fraternal, la nuesa organización y la nuesa acción tien de ser llibre, igualitaria y fraternal.

Pero tamién pensamos que cada agresión estatal o patronal tien de tener una respuesta. Nun ponemos la otra mexilla nin resignámonos a la inxusticia. Esti principiu d´autodefensa implica la confrontación con patronos ya instituciones.

Por tou esto CNT ye anarcosindicalista.

De la confluencia del sindicalismu revolucionariu que defende la emancipación de les trabayadores por si mesmes y l'abolición de la sociedá de clases, y l'anarquismu, coles sos idees d'organización non xerárquica nin autoritaria, de coherencia de fines y medios, d'instaurar el comunismu llibertariu, etc. surde'l anarcosindicalismu.

Al traviés d´una Sección Sindical, que ye'l conxuntu de trabayadores afiliaes a CNT nesa empresa o centru de trabayu. Organízase al marxe del Comité d'empresa y en principiu solo representa y actúa en nome de los sos componentes, anque puede llevar a cabu acciones o pidimientos colectivos. Los delegaos d'una Sección Sindical tán protexíos frente a la empresa y nun pueden ser despidíos por faer acción sindical, y de selo, el despidu sería consideráu nulu nos xulgaos. Si quies informate más sobre esto consúltalo nel sindicatu.

La CNT en principiu organízase como Sindicatu d'Oficios Varios, arrexuntando a afiliaes de distintos sectores. Cabe la posibilidá, si danse les condiciones, de fundar sindicatos de ramu (Metal, Comerciu, etc)

Mediante la so asamblea de afiliaes. Cada vez que se convoca l'asamblea, les afiliads alderiquen l'orde del día y tomen los sos alcuerdos.

Nun hai directiva que pueda decidir poles afiliaes. Namás tenemos un comité ensin poder executivu.

L'asamblea del sindicatu noma a unes persones por que lleven a cabu xestiones necesaries pal funcionamientu del sindicatu. Xeres que polo xeneral nun precisen de l'asamblea pa ser llevaes a cabu. Estes persones formen lo que se llama'l comité sindical.

El comité de CNT tien una serie de llimitaciones pa evitar que se convierta nun grupu de dirixentes.

-Les miembros del comité del sindicatu, y por estensión, de tolos comités de la CNT, nun pueden recibir un salariu pola so militancia.

-Tolos comités son mecanismos de xestión y coordinación, polo que nun van poder tomar alcuerdos. Namá van poder desenvolver les decisiones de les asamblees del sindicatu y los sos encargos. Nel casu que por imperiosu urxencia o necesidá tuvieren de decidir daqué, van tener que dar cuenta de la xestión a l'asamblea, que va decidir si la so actitú foi o non correcta.

-Tolos cargos son revocables en cualquier momentu. L'asamblea ye llibre d'obligar a dimitir a los sos representantes si considérenlo oportunu. Procúrase que los cargos sían rotatorios.

-El comité como tal nun puede faer propuestes a l'asamblea del sindicatu.

Tou comité tien que ser refrendáu n'otra asamblea tres la so elección.

-Tolos cargos tán siempres a disposición de l'asamblea.

-Los miembros de partíos políticos nun pueden tener cargos na CNT.

-En toa asamblea los comités tienen qu'esplicar les xestiones realizaes poles distintes secretaríes.

-Los comités de CNT nun tienen opiniones propies. Cuando falen facer en nome de la totalidá de la organización y los sos alcuerdos.

-El comité en CNT ye namá un mecanismu de relación y alministración, non un grupu de poder.

Nos conflictos el trabayadores y trabayadores emplegamos les nueses armes:

-Procedimientos de denuncia, como manifestaciones, concentraciones, actos de protesta, octavielles, notes de prensa, etc. qu'informen del conflictu a la ciudadanía, al empar que faen que la empresa pierda la so bona imaxe. Procedimientos de boicó, polos que se procura qu'el/la consumidor/a o l´/al usuariu/a d'una empresa, dexe de consumir el productu.

-El sabotaxe, que pretende que'l productu ufiertáu pola empresa nun llegue a esistir.

-La fuelga nes sos múltiples variantes, qu'ataya la producción de la empresa.

Tou conflictu nel qu'intervien la CNT, ye escalonadamente sacáu del ámbitu de la empresa, pa convertise nun problema local, rexonal, nacional ya inclusive internacional. Al traviés de la Solidaridá y del Apoyu Mutuu'l conflictu sale del so estrechu ámbitu, intervien muncha más xente nél, y asina consiguimos salir airosos en grandes, medianes y pequenes empreses.

Consiguimos ésitos ellí onde abogads y sindicatos con cientos de miles d'euros de presupuestu fracasaron. Esto ye por cuenta de que en les nueses reivindicaciones nun tamos guiaes polo que ye llegal, sinón polo que ye xustu. Un problema asumíu pola CNT nun dexa de ser espuestu hasta que se llogra un alcuerdu satisfactoriu, déannos los xueces o non la razón. Nun dexamos de puxar hasta que s'agoten les nueses fuerces, y eso tarda n'asoceder.

Al nun tener que pagar salarios a dirixentes, toos nuesos recursos son emplegaos na acción sindical. Gracies a ello un sindicatu modestu económicamente como'l nuesu, esfruta d'un mayor presupuestu cuando una reivindicación ye puesta sobre la mesa. Na economía sumerxía, nel sector de precarios, en pequeñes, medianes y grandes empreses, en Multinacionales, na Alministración Pública, la nuesa acción sindical amosó la so eficacia.

La CNT, sicasí, diz NON a les elecciones, NON a los lliberaos y NON a les subvenciones. Nun queremos profesionales pagaos pola empresa.

Nun queremos intermediaries.

Nun queremos más recursos que los nuesos, los que salen de les nueses cuotes y de la nuesa voluntá colectiva. Veamos por qué.

La llei estipula que pa ser un sindicatu representativu» hai que presentase a unes elecciones sindicales nes que s'escueyen delegaes sindicales y comités d'empresa. CNT nun participa neses elecciones y propón el so boicó poles siguiente razones:

Si yes precaria o trabayes nuna pequena empresa nin siquier puedes participar. Solo una minoría de trabayadores/as tien elecciones sindicales.

Coles les elecciones das-y a les tos “representantes” el poder de decidir, firmar y negociar por ti ya imponete la so voluntá y queden 4 años fora del to control. Sicasí si que tán controlaes poles cúpules de les organizaciones sindicales a les que pertenecen.

Coles elecciones, les organizaciones sindicales llogren lliberaes y subvenciones colos que se caltienen. No fondero, ye una cuestión d'intereses económicos.

Les lliberaes sindicales cada vez tienen menos en común coles trabayadores, tienden a profesionalizase o a vivir del cuentu y solo interésa-yos caltenese, defenden los sos propios intereses y non los tuyos.

Una vegada que t'arrampuñaron la representatividá” y que consiguieron lliberaes y subvenciones y un ciertu marxe d'influencia, yá nun-yos intereses, los programes electorales escaécense y meyor que calles y seyas sumisu, igual asina consigas dalgún favor (en cuenta de que se respeten los tos derechos). Solo quieren el to votu y que nun deas problemes.

Les elecciones sindicales y los comités d'empresa beneficien a les empreses y a l'Alministración, qu'a lo postrero son quien los financien. Coles elecciones sindicales, que'l so orixe ta nes elecciones del sindicatu vertical franquista, empreses y alministración consiguen interlocutores pa nun tener que tratar directamente coles trabayadores. Estos interlocutores llegales caltienen a les trabayadores a raya, sumises y desmovilizaes, porque son los primeros interesaos en caltener la so posición y dependen directamente de les subvenciones y lliberaciones.

Puedes pensar que si non te presentes a eses elecciones, nunca vas ser representativu . Ye falsu. Tu y solo tu, yes representativu. Tu, cuando tomes nes tos manos los tos problemes, adquieres representatividá. Tienes tol derechu a negociar, a lluchar, a decidir sobre aquello que t'afecta. Nun creas nesa hestoria de la representatividá electoral.

CNT ye representativa porque les sos afiliads otorguen representatividá, porque cuando llucha la so llucha ye xusta, porque les sos reivindicaciones son les de les trabayadores. Eso ye ser representativa, eso ye tener pesu, eso ye tener dignidá. Lo otru, lo de les elecciones, nun ye más qu'un baille de mázcares nel qu'unos esperpentos qu'apaecen na tele roblando, sonriendo, sermoneando y dando la mano a empresaries y gobernantes, repártense subvenciones.

Tenemos unes reivindicaciones mínimes que llevamos a toos nuesos conflictos, por exemplo: queremos xubíes de salariu llineales que beneficien a los salarios más baxos; queremos que les xubíes efectúense sobre'l sueldu base y non sobre los complementos; negámonos a realizar hores extras y destayos; tamos en contra de los nuevos sistemes de trabayu qu'impliquen desafectación del puestu, polivalencia y movilidá funcional y xeográfica; lluchamos por frayar la cadena que nos ata a la máquina empresarial, menguando la xornada de trabayu, aumentando'l tiempu de vacaciones y ociu, adelantrando la xubilación a los 55 años; procuramos que'l sindicatu controle lo que produz el trabayador/a, negando'l so sellu de garantía cuando'l productu seya dañible o de baxa calidá; impulsamos que les trabayadores, les sos asamblees y les sos secciones sindicales tengan derechu a la negociación; pidimos una llibertá sindical auténtica, que pase pola eliminación de subvenciones a les centrales sindicales, y que dexe l'actividá sindical dientro de les empreses ensin nengún tipu de llimitación…

Ganar más dineru, tener un contratu estable y que nel barriu haya bonos servicios, eso ta bien. Pero, si afíteste, vas poder ver qu'esti mundu ta mal repartíu.

Disponemos d'unos recursos como nunca los hubo na hestoria de la Humanidá: conocimientos, enerxía, medios de comunicación… Y sicasí tamos arrodiaos de plagues:pandemies, fame, guerres, racismu, paru, abusu de poder. Eso pasa equí al llau, equí mesmu.

Y les causes son conocíes: privilexos en manos de unos pocos d'individuos, qu'empleguen la violencia de la manera más impune, avalaos pol aparatu del Estáu y de los sos medios de represión.

El mafiosu más encallecíu ye un anxelín comparáu col grupu de plutócratas y mandatarios qu'entamen guerres, viven nel luxu y reciben la bendición papal nes audiencies del Vaticanu.

Piensa nos llamaos accidentes de trabayu, que dexen mas d'un millar de muertes al añu, ¿quién son los responsables, sinón los industriales ensin escrúpulos y los gobernantes preocupaos más nel dineru que na vida?

Por eso la CNT non llucha namás por ganar cuatro cuartos más qu'a la fin se come la inflación, sinón por otru tipu de mundu.

Eso ta perbién -tas pensando-, pero ¿qué ye lo que queremos en realidá? Queremos lo que dicen a toes hores: queremos la paz; queremos la llibertá; queremos el frutu del nuesu trabayu, habitar nuna casa, dir a una escuela…

Pero pa qu´eso llegue, hai qu'acabar coles causes de la desigualdá. De nada val la caridá. Sieglos de llimosnes nun sirvieron pa traer la Xusticia, porque les causes de los males del mundu, de la violencia, de qu'haya riqueces enormes en manos de banquers y empresaries, son l'Estáu y el Capital.

Queremos una sociedá ensin Estáu, ensin Clases Sociales, ensin dineru na que nun quepa'l poder, la violencia nin la esplotación d'unes persones sobre otres.

Nun engañamos a naide: somos lo que queremos ser, y non lo que quieren que seyamos.

Y esto ye lo que somos: asalariaes, xubilaes, paraes, estudiantes..., etc., homes y muyeres que percima de diferencies ideolóxiques, raciales, de xéneru, d'edá, de categoría profesional…, xunimos fuerces pa enfrentanos a los nuesos adversarios.

Somos primero de too trabayadores como tú, una parte de la Clase Obrera que decidió organizase pa camudar les coses.

Queremos dexar de ser mercancía que s'usa o se tira a la basura dependiendo de les necesidaes d'empresarios, banqueros, políticos…

Queremos faer valir la nuesa dignidá robada a cambiu de la supervivencia.

Queremos unes vides que merezan la pena ser vivíes.

Nun tenemos que tener mieu a nada.

Vamos camudar el mundu.

Tamos empezando namás.