25N: Ensin mieu. Ensin violencia. Muyeres llibres.
📍 Manifestación xunitaria
🗓 Martes 25 payares
🕖 19:00h – Avilés, Plaza Vaticano
Ensin mieu. Ensin violencia. Muyeres llibres.
Ta bien esperar la revolución ca día; pero ye meyor salir a buscala, forxándola minutu a minutu nes intelixencies y nos corazones.
El 25 de payares ye’l Día Internacional pola Eliminación de la Violencia escontra les Muyeres, una violencia que, nel sistema capitalista nel que vivimos, manifiestase en tolos ámbitos de la vida de les muyeres: na familia, nel trabayu, na cai, na enseñanza, nes instituciones, nel accesu a la información, nes redes sociales…
Esta violencia nun ye solo física, sinón qu’adopta distintes formes: dende los golpes hasta los menosprecios, la discriminación, la cosificación y les diverses espresiones de violencia sexual o económica.
La muyer trabayadora non solo tien que defendese de la esplotación empresarial, sinón tamién de la violencia que puede provenir de los sos propios compañeros. Dende la CNT, trabayamos por que’l sindicatu sía una ferramienta útil al serviciu de la emancipación de les muyeres, y un espaciu nel que podamos sentinos segures.
Para llogralo, ye imprescindible una toma de conciencia per parte de los homes; una conciencia que non se base namá nes palabres, sinón que parta d’un analís autocríticu y materialícese en fechos concretos. Solo asina’l sindicatu va poder responder a los pruyimientos de la muyer trabayadora, forxando —como dicía Lucía Sánchez Saornil— una revolución nes intelixencies y nos corazones.
